کلأچئه (کلاچاى)، لطره، همیشک کاسپی دریا

گیلک خلکˇ رئه
کلأچئه (کلاچاى)، لطره، همیشک کاسپی دریا

latre.blogfa.com

وبمجی
<-- Start v6rg.com Gil6ki Calendar -->
Gil6ki Calendar
<-- End v6rg.com Gil6ki Calendar -->

۹ مطلب با کلمه‌ی کلیدی «دامون» ثبت شده است


هاویر

 

 

هاویر آزادی ره مردۊم بزیون

خؤشی ؤ عززتˇ همرأ دزیون

 

زیمین ؤ آسمؤنˇ یاورابۊن

خۊشؤنˇ مۊشکلؤنˇ داورابۊن

 

هاویر آزادأبیم ظۊلمˇ جی هاویر

هاویر دۊنیا وکئه خلکˇ شی هاویر

 

هاویر نکلئه دئه مۊشک مردۊمˇ سر

بۊخؤسه، تم بزأر، زأک، خۊ مۊما ور

 

دئه مأرˇ سینه مئن ترسی نۊمؤنه

بۊخؤنه این گرش شادی ترؤنه

 

هاویر هیشکس نؤگئه دئه هیشکسه زۊر

نؤبۊن جنگˇ جی هیشکس ناقص ؤ تۊر

 

هاویر خنده صیدا دۊنیا وگیره

هاویر مظلۊم، خۊ حققه هگیره

 

هاویر مرزˇ دسˇ جی راحتأبیم

تۊفنگˇ ناکسˇ جی راحتأبیم

 

هاویر دئه هیشکسی وشنأ نۊخؤسه

کسی فرده غمˇ همرأ نۊخؤسه

 

دامؤن_لتریج

 

۰ نظر موافقین ۰ مخالفین ۰ ۲۳ مرداد ۹۵ ، ۰۱:۴۳
Damön lөtrij

خۊدا نؤمی

مئن-خۊرتاو (دئباری خۊرتاو/خۊرخؤس آسیا ؤ کلسیه آفریقا) أمی دئباری سامؤنه. ای دئباری سامؤنˇ مئن عربان ؤ تۊرکان ؤ کۊردان ؤ لۊران ؤ گیلکان ؤ فارسان ؤ بلۊچان ؤ تۊرکمنان ؤ یهۊدئن ؤ أرمنئن ؤ ... چندین هیزار سال کسنˇ ور بزیوسن ؤ کسنˇ همرأ هدأهگیر دأشتن.

دئباری اثرؤن نۊشؤن دنن گه ای مردۊم کسنˇ همرأ همیشک خۊرۊم ارتباط دأشتن ؤ أگرن جنگی بؤ، جؤردستئن ؤ کیاؤنˇ شی بؤ عاددی مردۊم فقط اۊشؤنˇ ویشترخازی هزینهٰ هدأن ؤ قبل ؤ بعدˇ جنگ هنده کسنˇ همرأ رابطه دأشتن.

مؤعاصر سرؤنه (دؤران) مئن، وختی تازه دؤلت-مللتؤن چاته بۊبؤن، هر ته سامؤن خؤره یته تازه کشور بۊبؤ یؤ بۊشؤ خۊ تاریخˇ دۊمبال، چۊن دؤلت-مللت خؤره سیوا ؤ پۊرگۊلاز تاریخ خأنه. نم نم بدیم گه ای قؤمانˇ مئن سیوایی دکت ؤ مردۊم کسنˇ همرأ جنگسنه سرأگیتن. اۊ خطی گه نقشه'نˇ مئن أنی، مرزˇ نؤمی، تعیین بؤتن باعث بۊبؤ ای جنگ تشدید بؤبۊن. خطی گه گاگلف چن ته خانوادهٰ کسنˇ جی سیوا گۊد. مثلن کۊردان دکتن چار ته دؤلت-مللتˇ مئن گه هر ته خۊ وأسر خأس سیوا تاریخ بدأره ؤ سیوا فرهنگ ؤ هین° دؤنی هیشته کۊردانه حیساب نیأرد. هی اتفاق دبخی أقوامˇ وأسرٰن پیش بۊمأ ؤ هر تازه دؤلت-مللتˇ مئن دبخی قؤمان سرکۊب بۊبؤن ؤ هین باعث وکت ای جنگˇ تش تا ایمرۊ هلأ بل گیره ؤ مردۊمه سۊجأنئه دره. ایمرۊ ینیم گه مئن-خۊرتاوˇ مئن هر طرفˇ جی اۊشماره صدا جؤر شۊنه ؤ مأرؤن خۊ طفلؤنˇ وأسر ؤ زأکؤن خۊ پئر ؤ مأرˇ ره اۊشماره کۊنن.

دۊنیا مئن مئن-خۊرتاوه، همه جنگ ؤ نفت ؤ ترؤریسم ؤ ... همرأ شینأسنن ؤ أمی مردۊمه وختی مؤهاجرت کۊنن، یۊجۊر نیا کۊنن بدأری أمی شیرخؤر طفل أنی ترؤریسته. أمی مردۊم هر رۊز صد ته صد ته هیزار ته هیزار ته میرن ولی هیشکسˇ ره مؤهم نیه ولی کافیه اۊرۊپا ؤ آمریکا مئن یه نفر ترؤریسمˇ جی بمیره، دۊنیا همه عزادار بۊنن ؤ اینترنتˇ مئن همهٰ شۊر گیره گه چه ره ؤ چۊتؤ...

أمی مردۊمˇ خۊن دبخی مردۊمˇ خۊنˇ همرأ تؤفیر نأره. فقط شاید چؤن هر رۊز ای داستان هیسه شمه ره عاددی بۊبئه. وختی ای داستان عاددی بؤبۊن دئه وأ آدمیتˇ فاتحهٰ خؤندن. این گه بییم بؤگیم مئن-خۊرتاوˇ مئن ای داستان همیشکی هیسه ؤ اۊرۊپا مئن نیه یعنی قؤبۊل بؤتیم مئن-خۊرتاوˇ آدمؤن ده بی ارزش وکتن ؤ اۊشؤنˇ مؤردن ایراد نأره.

مئن-خۊرتاوˇ مرگ ؤ میر، آفریقا مردۊمˇ وشنأیی ؤ هرجاىˇ دۊنیا هر بلایی گه مردۊمˇ سر هنه هرگیز نوأ عاددی وکئه أمی وأسر.

أگر عاددی هیسه وأ بنیشیم ؤ خۊ همرأ خلوت بؤنیم گه چه ره عراقˇ مئن وختی بؤمب ننن ؤ صد ته آدم میره أمی وأسر أهمیت نأره، چه ره وختی کارگر شللاق خؤره أمی وأسر أهمیت نأره، چه ره فرانسه آدمؤن پرپر بۊنن أمی قلب شیکنه ولی افغانستانˇ مئن مردۊم جؤن دنن أمه ره مؤهم نیه.

آمۊ مردۊمی هیسیم گه کشمیرˇ جی تا آفریقا کلسیه تاریخˇ مئن هیزار هیزار فرهنگی اشتراک ؤ تاریخی ارتباط دأشتیم ؤ دأریم. نوأ هیتؤ راحت ای قضیه جی دوأریم گه آمۊ گیلکؤن، بین النهرینˇ آدمؤنˇ همرأ فرق کۊنیم ؤ ایمه خؤره دیچکنیم اۊرۊپا آدمؤنه. آمۊ وأ بۊدؤنیم گه هیچ فرهنگی خؤره چاته نۊبئه. هر فرهنگی خۊ همساده'نˇ جی تأثیر بیته ؤ اۊشؤنˇ سر تأثیر بنئه. ولی مؤتأسفانه آمۊ ینیم بعضئن گۊنن أمی فرهنگ دبخی قؤمانˇ جی پیشرفته تر هیسه ؤ ای نیگا همرأ خۊ همساده'نˇ همرأ دۊشمندی کۊنن.

مئن-خۊرتاو أمی شی هیسه. هر بلایی اۊنˇ سر بیه أمی سر هنه، هر پیشرفتی بۊنه أمه ره'ن وأ خؤره اۊنˇ مئن سهیم بۊدؤنیم. أگر جایی ضعفی دأره وأ ایلجار بؤنیم اۊ ضعفˇ همرأ بجنگیم ؤ اۊنه ارتقا بدیم. نأ اینکه شؤنه خالی بؤنیم.

ای خط کشی، هر نؤم ؤ دلیلی همرأ فقط یه چی ره خۊبه: جنگ. هی بازئنˇ همرأ راحت-راحته أمی مردۊمˇ سر کۊلا شۊنه ؤ جؤردستئن راحتتر تۊنن أی مردۊمه بچاپن. مردۊمی گه اۊشؤنˇ جؤغرافیا دۊنیا مئن تکه وأ همیشک جنگˇ همرأ درگیر بؤبۊن ؤ وشنأیی بکشن. ایمه یه عده اۊ جؤر جؤرنˇ جی ای مردۊمˇ ثروته بچاپه. اۊنن خۊدا ؤ آزادی نؤمˇ همرأ. بۊدؤنین مئن-خۊرتاوˇ هوأ آمۊ وأ بدأریم. آمۊ هیسیم گه ای سامؤنˇ مالک ؤ وارثیم. نوأ بیئلیم أمی سره شیره وأسینن ؤ أمی سره چرت ؤ چۊلؤ مسئله'نˇ همرأ کۊلا بنن. مئن-خۊرتاوˇ أمی شی هیسه. هر تۊرک ؤ عرب ؤ گیلک ؤ ... وأ بۊدؤنه گه مننئه خؤره سیوا بۊدؤنه دبخی قؤمانˇ جی. وأ بۊدؤنیم گه أگر ایجؤنأیی ندأشته بیم، نأ فقط أمی ثروت ؤ سامؤنه أمی جی گیرن، أمی هویت أنی أمی جی دۊزنن.

استۊارت میل گۊنه: "أگر خنین یه جأ استعمار بؤنین، بئترین را اینه گه اۊشؤنˇ فرهنگˇ جی شۊرۊ بؤنین. وختی أمی فرهنگه أمی جی هگیرن أمی هویته چیکأدأیم. وختی بی هویت ببیم تۊنن هر بلایی أمی سر بیأرن. وختی بی هویت ببیم خؤره جیرتر ینیم. وختی خؤره جیرتر بینیم احساس کۊنیم حقیریم، پستیم. وختی خؤره حقیر بۊدؤنیم هخسأى کۊنیم اۊ جؤرتری هویته چیک بزنیم تا أمی حقارته جا بدیم ؤ خؤره جؤرأکشیم. ایتؤ بۊنه گه وکنیم اۊ زرج گه خأس کلاچˇ را شؤنه بیأمۊجه.

مئن-خۊرتاو أمی شی هیسه. هیچچی ای سامؤنˇ مئن مطلق هیچ قؤمی شی نیه. ای داستان زوؤنˇ مئن کامل مؤشخصه. أمی زوؤنؤن همه کسنˇ همرأ اشتراک دأره.  آمۊ مردۊمی هیسیم گه هۊتؤ گه پۊر اختلاف دأریم پۊرپۊر اشتراک دأریم. چه ره وأ ای اختلافانˇ همرأ جنگˇ بله ویشتراکۊنیم؟ اۊنی گه أمه ره چاپسه-دره هینه خأنه. خأنه آمۊ ای اختلافانˇ همرأ کس-کسه جؤن دکیم تا تۊنسه-بۊن راحت-تر بچاپه أمه ره

أمی وأسر ژست گیرن گه آها تۊ گیلکی، تۊ تمدنˇ بلته هیسی؛ اۊ فارس ؤ تۊرک ؤ ... أسأ تی قد ؤ قامت نیه گه بیه "منم" بزنه. تۊ ایرانی هیسی. عربؤن سۊسمارخؤرن، کی اۊشؤنه حق بدئه بیأن ؤ گب بزنن.

ای چرت ؤ چۊلؤنˇ همرأ چندین ساله أمه ره چاپسه-درن ؤ أمه ره'ن بخیاله "نژاد برتر" هیسیم ؤ هیچی أمه ره مؤهم نیه.

نأجه دأرم مئن-خۊرتاوˇ آدمؤن هنده دئبارˇ مۊسؤن کسنˇ همرأ برأر-برأر وکن ؤ ای جنگ ؤ تفرقه أمی سامؤنˇ جی بؤشۊن.

نأجه دأرم أمی دئباری خۊرتاو هنده ایجؤنا وکئه ؤ تۊنسه-بیم دئباری زمتنˇ مۊسؤن هنده أمی پیشرفتˇ همرأ نۊشؤن بدیم گه أمی نقش، تاریخˇ مئن تۊمانانۊبئه.

 

بزیوه دئباری خۊرتاو

 

دامؤن لتریج

اسفندار ما هشدم

.

.

.

مئن-خۊرتاو: خاورمیانه

کلسیه: شۊمال

ویشترخازی: زیادی خایی

بزیوسن: (زیوستنˇ مصدرˇ جی) زیندیگی گۊدن

دئباری: کهن

کیاؤن: پادشاهؤن

هین دؤنی: هینˇ وأسر/وأسی/ویسین

دوأریم: (دوارستنˇ مصدرˇ جی) بۊگذریم

بییلیم: والیم (ایجازه بدیم)

۰ نظر موافقین ۰ مخالفین ۰ ۲۶ تیر ۹۵ ، ۰۱:۴۶
Damön lөtrij

مگه بۊنه تی جی مۊ دس ویرم؟

مگه بۊنه مۊ تی بؤنهٰ نیرم؟

نؤبۊنه، تی دۊری جی سۊته درم

می دیلˇ گبه کئه ره گۊته درم؟

 

تۊ بۊشى نئسأى مه ره تنها بنأى

تۊ بۊشى ؤ أمی سر خاک لا بدأى

 

نانجیبان دس پرأگیتن ته ره

تۊ بۊشى ؤ هیچچی نؤتی أمه ره

تی جیجأکی جؤنه ویتی ؤ بۊشى

أمه ره تنها بنأى بیلأخره

 

چۊتؤ تۊنم بنیشم. تم بزنم؟

چۊر تۊنم ای کش ؤ اۊ کش نگنم؟

تۊ بیه، بئس، مۊ دئه هیچچی نخنم

 

تی بۊشؤ پسی داران دؤخۊشتن. ده وگرد

تی بۊشؤ پسی أمه‌ر فۊدۊشتن. ده وگرد

 

بیه ؤ بد تا نؤکۊن. وگرد أمی ور

بیه زۊتتر

نینی ظالم آدمؤن کتن أمی سر؟

بیه زۊتتر

 

تۊ نیأنی. مۊ گه دؤنم تۊ نیأنی

آمۊ وأ خؤر را دکیم بییم تی دۊمبال

وختی هممه همصدا ببیم تی دؤنی

خؤر هأنی تۊ، خؤره هأنی أمی دۊمبال

۰ نظر موافقین ۰ مخالفین ۰ ۰۲ آذر ۹۴ ، ۱۶:۵۸
Damön lөtrij

لعنتی ویریس چهره نیشتی تی جا سر

ترسنی ویریسی ؤ ایمأ تی جا پر؟

چنچی جا دأرێ مگر، هۊنه خؤشأتی؟

ایتؤچی غۊله برأر تۊ خؤره چاتی

بیىه هممت بؤنیم

تا أمی زأکؤنˇ فردهٰ چانیم

تا گه شرمنده نبیم

بیىه هممت بؤنیم

سر جیرأردن أمی ور داب نبۊ هرگیز

بیىه سربۊرز ببیم

أمی تنخاىی بدأ بل بؤنه

بدأ تنخاىی أمی دۊشمنیىه گٚل بؤنه

بیىه سربۊرز ببیم

بیىه تی دسته می شؤنه سر بنی

ىاعلی بؤگۊ ویریس

بیىه هممت بؤنیم

بدأ سربۊرز ببیم

 

1005

20/11/88

اسفندارما

 

 

۳ نظر موافقین ۰ مخالفین ۰ ۰۷ تیر ۹۴ ، ۱۱:۱۶
Damön lөtrij

می دؤلۊسبزأ سامؤن خیلی زۊمات هیسه گه خۊرˇ رفاق نیشته تا شاید أفتؤ شبق اۊنˇ دیمهٰ بگنه، تا شاید اونه بئینن.


می وؤسۊسه مردۊم خیلی زومات هیسه گه یته قهرمانˇ رفاق هیسن تا بییه ؤ اۊشؤنه ویریسأنه، تا شاید ویریسن.


می وأکته مردۊم خیلی زۊمات هیسه گه سر بنأن زؤنۊ سر ؤ خؤره خؤره خؤسأنئهدرن. تا شاید دئه درد نکشن.


می سامؤن دؤلۊس نزأنأبی اگر مردۊم قهرمانˇ رفاق نئیسأبی ؤ زؤنۊ سر، سرˇ جأ خۊ دسهٰ بنأبی.


اگر خۊ لسˇ دستهٰ مۊشتاتهبی ؤ خۊ سرهٰ راسساتهبی.


اگر خۊ چیشمهٰ آسمؤنˇ مئن دۊجسهبی.


آخ اگر ای مردۊم دؤنسهبی.


 

Mi Dölus Bөzä Sämön Xөyli Zimăt Hisө Gө Xur ө Rөfăq Ništө Tă Šăyөd Aftö Šөbөq Un ө Dim'ä Bөgөnө. Tă Šăyөd Un'ө Bëynөn.

 

Mi Vösusө Mөrdum Xөyli Zumăt Hisө Gө Yөtө Qөhrөmăn ө Rөfăq Hisөn Tă Biyө ö Ušön'ө Virisänө. Tă Šăyөd Virisөn.

 

Mi Väkөtө Mөrdum Xөyli Zumăt Hisө Gө Sөr Bөnän Zönu Sөr ö Xörө, Xörө Xösänë Dөrөn. Tă Šăyөd Dө Dөrd Nakөšөn.

 

Mi Sămön Dölus Nөzä'nä Bi Agөr Mөrdum Qөhrөmăn ө Rөfăq Nөysä Bi ö Zönu Sөr, Sөr ө Jä Xu Dөs'ө Bөnä Bi.

 

Agөr Xu Lөs ө Dast'ä Mušt'ătө Bi ö Xu Sөr'ä Răs'sătө Bi.

 

Agөr Xu Cism'ä Ăsөmön ө Mën Dujөsө Bi

 

Ăx Agөr I Mөrdum Dönөsө Bi


۱ نظر موافقین ۰ مخالفین ۰ ۱۷ فروردين ۹۴ ، ۱۲:۵۹
Damön lөtrij

سلاو


ایمرو اسفند ماه بیسˇ چارمه گه بونه آولˇ ما دهوم دئه یه هفته جی کمتر بومؤنسه تا خورشیدی سال تمنابون. خسم عید موارکی بگوم بدئم چی عیدی؟ چی کشکی؟ هرکسˇ یئنی ناراحته. هر کسˇ گبه ایشتؤبنی گونه زوتتر تمنابون وأکتیم.

نفأمنم این دئه چور زیویشه گه همه نالنن ؤ همهٰنی خو کیفˇ سر درن. ایرا هنی مرکه گونه بینزین أندی گرانابئه جایی شؤ نیشأنه. اورا شونی زنکه گونه أندی ارزاق گرانه چیزی هئه نیشأنه. ایمه هرجا شونی مردوم کلسن راشئ مئن هر خؤنه مئن شونه انواع خوراکئن نئه.

چندی ای مردوم خؤبن. ندأرنهٰ ولی حاضرن تا کمر به جیر بشون قرضˇ بون ولی خو تفریحه عالی بؤنن ؤ خو خوراکه بدأرن. ایمه نالنن.

ندأرنهٰ، ایمه هر دفأ شونی اوشؤنˇ ور یئنی تازه چیکچی هأیتن. اونن چی، بئترین جنس ؤ گرؤنترین. ایمه اگر یه نفر بیه بگون فلؤنی چن تومن دأری مأ هدی تا ... (تا هر چی. موهم مگر؟) ایشؤنˇ دیم سورخابونه خو کۋنه یته پیچ دنن، یته خفه زنن ؤ شورؤ کونن دورؤ گوتنه گه ولله به پیر به پیغؤمبر به علی ابلفضل و دئه همهٰ کشنن وسط تا مرکه خو بزأگبˇ جی پشیمانابونه.

خا چهره؟ ای سرنوگون دورؤ چئه گه آمو تترج گونیم؟

بیین قرار بنین ای نؤسالˇ مئن ای سرنوگون دورؤئه أمی زیویشˇ جی وورؤنیم.  هر روز خؤر بؤگیم دورؤ تأتیل. فقط راستی

 

یا حق

 

دامون لتریج

10/8/88

 

۱ نظر موافقین ۰ مخالفین ۰ ۲۴ اسفند ۹۳ ، ۱۲:۴۲
Damön lөtrij
۰ نظر موافقین ۰ مخالفین ۰ ۲۰ اسفند ۹۳ ، ۱۶:۱۸
Damön lөtrij

Ăqă Dăr Surx'ă Bö

Andi Mөrdum

Xu Rөk'ө Tөškө Bөzän

..................................................

آقادار سورخابؤ

أندی مردوم

خو رکه تشکه بزأن

۰ نظر موافقین ۰ مخالفین ۰ ۲۹ تیر ۹۳ ، ۱۵:۱۲
Damön lөtrij
خودا نؤمی

سلاو

دامؤنم http://www.latre.blogfa.com   نیویشتنکس.

 

واخؤابؤم گه ای سیستم بلاگفا جی خئلی بختره. پس ... بلاگفا بای بای.

 

تترج چنته می او لابدؤنˇ وانویسؤنه نأنم تا ایپچه فضا پورابون.

 

امید دأرم ازازا بلاگفا جی بختر ببون و هچی قیافه نبون.

 


 

DĂMUN LӨTRIJ

 

1423 Z.P

12/12/1587

Z.P=P.M
۰ نظر موافقین ۰ مخالفین ۰ ۲۹ تیر ۹۳ ، ۱۴:۳۵
Damön lөtrij