زؤمۊسسؤن
سه شنبه, ۳۰ آذر ۱۳۹۵، ۰۸:۰۵ ب.ظ
مه'ره ایمشؤ یا چلله شؤ ندأره
می همرأ پۊر زماته چلله قأره
ای ورفؤنˇ سرˇ سۊرخئنه بینأ
می دیلˇ خۊنأجی نخشˇ نیگأره
تایسه سی ته شؤ أزمیت بگیته'م
می ایقبال چلله شؤ تۊرشˇ انأره
زۊمۊسسؤن! مۊ تره پیرأسسه مننئم
دؤنی تۊ در بیأردی می دمأره
زۊمۊسسؤن! دؤنی می کئنه وأچأنی؟
می پئر ؤ مأره، می خاخۊر برأره
سیویدˇ رۊ دأری عاشۊق تۊرأکۊن
ایمه آدم کۊشی؟ این ده چی کأره؟
زۊمۊسسؤن! تۊ أمی میرزأ بکۊشتی
بخۊشأنی أمی هۊ راشˇ دأره
زۊمۊسسؤن! چئلˇنؤ، یادأ گۊدی نأ؟
أمی کاکۊ، بۊنˇ رچ جؤر قطأره؟
چقد أرسۊ یؤ خۊنه هؤ فۊدۊشتی
پلنگؤنه دسأدأى چاربدأره
اۊشؤنه تۊ بؤگۊ گه جاهیلی بۊ
ألؤن چی خۊن دره چاکه، رۊباره؟
سیویدˇ رۊ، سیا دیل، چی بۊگؤم مۊ
تی خۊبی ؤ بدی یک در هیزاره
ایسه چللهٰ مره مززه بیأردی؟
هلأ تی چاقۊ می قلته فزأره
شاعر: ویژگال
