دراز شئر
دریا لگ نیشته بؤم
آرسۊ همرأ بؤگۊت
تم نزن تم نزن
آسمان بۊرمه گۊد
آسمان گۊرره گۊد
گۊت ویریس تم نزن
دریا لگ نیشته بؤم
آرسۊ همرأ بؤگۊت
تم نزن تم نزن
آسمان بۊرمه گۊد
آسمان گۊرره گۊد
خؤنه خأنم بؤشۊم
خؤنه أمما کۊیئه؟
هیشکی نئیسئه ایه
مئن دامؤن بۊشؤم أبران دپیتن
زیمی یؤ آسمؤن کس کسˇ همرأ
هچی هچی آزازا جنگ بگیتن
هوا سرده شرم دارم ندأرم
می دۊته وأکته لنگانˇ همرأ
سیأ رأشئکˇ مئن مۊ رادوأرم
ای راشئکˇ جی نیفرت دأره می دیل
همیشک تۋل همیشک تۋل دره تۋل
چهره ای خؤنه رأشی' یأته مننئم
یته دیواره نأ سر دأره نأ ته
تۊ هر رأ جی بشی تی پیش درأنه
تی آزادی' فوره، خۊن کلأنه
رۊز دراز رۊز دکتم دیوارˇ جؤن
مۊشتˇ همرأ
شاید ای دیوار فۊسئه
ونکت
بیه بال به بال فۊسأنیم دیوار
بی دیوار زیویش' أزمیت بئیریم
ایمأ بئینیم گه زیویش مززه دنه
دریا سؤن، آسمان تمتۊمئأزهٰ، زردˇ گۊشان لسˇ لس
تۊرˇ وا کۊ تۋکˇ جی را دکت ؤ مردۊمˇ خاو' فگنس
وختی بیعاری' خلکˇ جی بدی
وگرس
دریا کۊلاک، آسمان أخمئاچئه،
أبرانˇ آرسۊ کلس
دریا لگ نیشته بؤم
آرسۊ همرأ بؤگۊت
تم نزن تم نزن
آسمان بۊرمه گۊد
آسمان گۊرره گۊد
گۊت ویریس تم نزن
بدئم چفتم، بدئم پرکس درم مۊ
بدئم گه دردˇ جی ترکس درم مۊ
بدئم نیشته می ورجه یتته لاکۊ
اۊنˇ دیم' خۊشئأدأم ؤ ویریسأم