آدمˇ کۊته
آدمˇ کۊته چی دۊمبال مۊجنه؟
یه شر زمین
شر
شر ؤ ور
آدمˇ کۊته زمین-ہ کۊشنه
آدمˇ کۊته خؤر أنی فۊرشنه
آدمˇ کۊته
هر جا رسنه
دیوار کشنه
آدمˇ کۊته هیسم مۊ
مۊجنم
یته هم‌پا دۊمبال
فۊسأنیم دیوار-ہ
خؤره آزاداکۊنیم دیوارˇ جی
ده خؤره نؤفرۊشیم
زمین أنی نؤکۊشیم
آدمˇ کۊته هیسم مۊ
نخأنم آدمˇ دس أسیر وکم
زیویش أجی سیر وکم
مۊ خأنم
دۊنیا قانۊنانˇ همرأ بزیوم
آدمانˇ قانۊنان دیوارن
دیوار-ہ بد دأرم
آدمانˇ قانۊنان
أمه-ره
خؤجیر آدم چانؤکۊنه
أمه-ره ماشین کۊنه
نخأنم ماشین وکم
متأویل نیأم ماشینی زیویش-ہ
آدمˇ کۊته هیسم مۊ
مۊ چی دۊمبال مۊجنم؟
خۊشی دۊمبال مۊجنم
خۊشی یعنی مر ؤ تۊ
دیگری برده نبیم
یعنی قانۊن
أمی بال-ہ دؤنؤبۊسه
أمی میل‌بؤ بزیویم
هرجا، هرجۊر خأنیم
أمی سر زۊر دنه‌بۊن
آمۊ یعنی آدمان
نأ یه رۊمه
هممه
خۊشی یعنی آدمان آدمˇ جی
قانۊنˇ جی
مرزˇ جی
دیوارˇ جی
هر چی گۊزˇ گبˇ جی
آزادابۊن
آدمˇ کۊته هیسم مۊ
دامؤن لتریج – کۊرچˇ ما ۲۷
