دامؤن

خانه رؤشن بی چراغˇ رؤشنایی بئه؟ نیبه

تۊ أگر من تا نبی، مۊشکل‌گۊشایی بئه؟ نیبه

می سگ-ه عاره ببم نامردٚمانˇ زرخرید

پۊر، گدا کیسه جه غیر أز رۊسیایی بئه؟ نیبه

شایˇ بی‌تخت ؤ کۊلایم، تا کی می پا سر ایسأم

شق بدأشته گردنˇ قسمت گدایی بئه؟ نیبه

دس‌والیشته سۊفره سر نیشتن هچین بدنامیه

سر ذۊغال‌چا مئن کۊدن، بی رۊسیایی بئه؟ نیبه

کاسه‌لیسˇ خانه زینت، قالیه جایˇ حصیر

تا نبؤسته کلمجین، دندان طلایی بئه؟ نیبه

تیجه‌یˇ شهپر ای رۊز آخر کلاچˇ قاتیله

کس‌کسˇ مئن دۊشمنی بی آشنایی بئه؟ نیبه

دۊستˇ أمرأ دیل می شین گرمه، به سر تا زنده‌یم

گۊشتˇ ناخۊنˇ میأن شیون، سیوایی بئه؟ نیبه

بیشتؤوین