دامؤن

مه'ر ؤ مۊ

تش دچئه بیم، نیشته بیم

خؤره پابرۊس کشیم ؤ گب زأدبیم

أولی بؤگۊت: "أخر هیتؤ بۊمؤنه

آمۊ مننیم بزیویم

وأ بیرۋجیم ؤ بشیم دامؤنˇ مئن."

دومی بؤگۊت: "بیرۋتن ده چیچئه

آمۊ وأ بیسیم

سۊمامۊسˇ مۊسؤن."

سومی بؤگۊت:

"نأ بیرۋجیم، نأ بجنگیم

اۊشؤن همرأ ایلجار بؤکۊنیم."

اۊ دۊ تهٰ، بدأری پایه بزأ بی

سۊرخابؤن، برزخابؤن

سومئه فترکسن:

"زردˇ گۊش! دؤنی أسأ چی گۊت دری؟

تۊ گۊنی مۊلکۊته'نˇ همرأ آمۊ همرا وکیم؟"

-"نأ... نأ...

ایتؤ نأ

اۊشؤنˇ همرأ بۊمؤنیم

تا بزیویم

نولأ

همه نؤم فکت بۊنیم

ایتؤ تۊنیم خۊ جؤنه در بؤبۊریم

ایمأ نم-نم أی حققه هگیریم."

دومی بؤگۊت: "نخأنم

مننئم

هندی آدم مگه زردˇ گۊش بۊنه؟"

اولی هیچچی نؤگۊت

ورسأم

تشˇ سر ومیشتم ؤ را دکتم بؤشۊم خؤنه.

دامؤن لتریج