گیلگمش - پؤلک ۲
گیلگمش اولین حماسه‌ی بشری هیسه
ای هؤسنی‌ئه مۊ وگردأنئم ؤ تصمیم بیتم نم‌نمئه بنم هی جیگه مئن ؤ شیمی نظرؤنˇ رفاق (رافا/ریفا) هیسأم.
اولی پؤلکه تۊنین ایه بۊخؤنین.
لؤح ۱- پؤلک ۲
ایسه اۊن اۊیه هیسئه، اۊنˇ جؤنˇ سر، مۋ بزئه، تنها شرˇ مئن هیسئه. اۊنˇ گیس، اۊنˇ سرˇ جی، گندۊم وۊشه مۊسؤن، زناکانˇ گیسˇ مۊسؤن چین بۊخؤرده'ر ؤ بکلسه'ره. سامؤن ؤ اۊنˇ مردۊمˇ جی هیچچی نۊدؤنه. خۊ جؤنه، جؤنٚورؤنˇ پۊستˇ همرأ فیویته. سۊمۊکانˇ مۊسؤن، بیجاران ؤ رؤمه'نˇ خۊدا، شۊکاؤنˇ همرأ چاکˇ واشه خؤره. پیله جؤنٚورؤن همرأ یه آوجیگه جی آو خؤره.
یته مالا هۊ آوجیگه مئن دؤم بنأ بؤ. انکیدؤ اۊنˇ ور بئیسأ. مرکه خأس خۊ گللهٰ آو هده. اول رۊج، دوم رۊج ؤ سوم رۊج انکیدؤ غضب بؤته'ر آوˇ لگ بئیسأبؤ. مالا اۊنه بدی. اۊنˇ دیم سۊأکته'ر بؤ. خۊ گلله همرأ وگردنه گاچهˇ مئن. برزخابۊنه. رۊئه بۊمه'ر سیا نیگا همرأ غیضˇ جی ژیویر کۊنه. اۊنˇ قلب، دردˇ جی پۊرابۊنه. چۊن ترسنه. اۊنی گه بیدئه بؤ، سی غۊله مؤنس.
مالا خۊ پئره، شۊلˇ همرأ گۊنه:« پئر! یته مردأک سی جی بۊمئه، آنۊ زأکؤنˇ مۊسؤن. اۊنˇ زۊر خئلی ئه. همیشک شرˇ مئن مۊجنه. جؤنٚورؤنˇ همرأ أمی آوجیگه ور هیسئه. اۊنˇ کتیر ترسناکه. دیل نأرم اۊنˇ ور بؤشۊم. چالکه'کی گه بکنده بؤمˇ پۊراتئه. هرچی دؤم بنأبؤم وزرأندئه. سأرا جؤنٚورؤن هممهٰ می جی برٚمأنئه.
پئر خۊ مالا وچهٰ بؤگۊت: «بؤشۊ اؤرۊک، گیل گمشˇ ور. ای وأشیاتˇ قؤوه جی اۊنˇ ره بؤگۊ. یته قشنگ زنأی اۊنˇ جی بخأ، گه خؤره ایشترˇ ره ،تنخایی خۊدا، پیشکش بؤگۊده‌بؤن ؤ اۊنˇ خۊ همرأ بؤبۊر بیرۊن. وختی گه گلله بۊشؤ آوجیگه، اۊنه لۊختاکۊن. تا اۊنˇ جی بهره بؤبۊره. هیتؤ گه اۊنه بٚینه، اۊنه نزدیکابۊنه. ایتؤ جؤنٚورؤنˇ جی بیگانه بۊنه. جؤنٚورؤنی گه سأرا مئن اۊشؤنˇ همرأ بار بۊمئه.»
مالا خۊ پئرˇ گبه بیشتؤبس ؤ بۊشؤ. اؤرۊکˇ را بگیت، بلتˇ طرف، برٚسی کیایه ؤ اۊنˇ پیش خؤره گل بزهٰ، ایمأ خۊ باله جؤرأگیت ؤ گیل گمشه بؤگۊت:
«دۊر سی أنˇ جی یته مردأی بۊمئه، اۊنˇ بۊنیه قٚوئه، آسمؤنی سپا مۊسؤن. چاکˇ مئن اۊنˇ زۊر زیاده ؤ همیشک سأرا مئن مۊجنه. اۊنˇ لنگان گلله همرأ آوجیگه ور نئه. اۊنˇ دئن زال ترکأنه. مه'ره نوأنه اۊنˇ ور بؤشۊم. نیألنه می تلهٰ بکنم، تۊر ورگأنم، دؤم بنم. می چاله‌که'نه پۊراته. می سأرا جؤنٚورؤنه می جی بۋرۋجأنئه.»
گیل گمش اۊنه ایتؤ بؤگۊت:
«می مالا! بؤشۊ یته خؤجیر زنکه ایشترˇ مۊقددس دۊعا جیگه جی، خۊ همرأ بؤبۊر اۊنˇ ور. وختی گه گلله همرأ بۊمأ آوجیگه مئن، زنکه رختانه، اونˇ تنˇ جی در بیأر. تا اۊنˇ جی بهره بؤبۊره. هیتؤ گه اونˇ بئینه اۊنˇ نزدیکابۊنه. ایتؤ جؤنٚورؤنˇ جی بیگانه بۊنه. جؤنٚورؤنی گه سأرا مئن اۊشؤنˇ همرأ بار بۊمئه.»
مالا اۊنˇ بؤگۊته'ره بیشتؤبس ؤ بۊشؤ. یته قشنگ زنأی ایشترˇ دۊعا جیگه جی وگیت ؤ را دکتن ؤ یابۊیه، کوچی ترین را جی بؤبۊردن . سومی رۊج برٚسئن ؤ قرار بنأن سأرا مئن بئیسن. مالا ؤ زنأی آوجیگه ورجه بئیسأن. یته رۊج، دۊته رۊج هۊ جیگه مئن بۊمؤنسن. گلله همأ ؤ آوجیگه جی آو خؤرد. آوی جؤنٚورؤن رۊخؤنˇ جی پرٚنن ؤ شۊنن. انکیدؤ، آسمؤنˇ قوی بچئر أنی هۊیه دره. شۊکاؤنˇ همرأ واش خؤره. پیله جؤنٚورؤن همرأ آو. خؤجیر ؤ خۊرۊم، رۊخؤنˇ لپپه'نˇ مئن واز ؤ ولنگ کۊنه.
